დღეს ბრაზილიური ფეხბურთის…

🇧🇷🎂 დღეს ბრაზილიური ფეხბურთის ლეგენდა, კარეკა იუბილარია!

ლეგენდარული ბრაზილიელი თავდამსხმელი, რომლის ნამდვილი სახელი ანტონიო დე ოლივეირა ფილიოა, თავისი თაობის ერთ-ერთ ყველაზე ცივსისხლიან და დინამიკურ ფორვარდად მიიჩნევა.

ფეთქებადი სისწრაფით, პოზიციის შერჩევის საოცარი ალღოთი და უძლიერესი დარტყმით გამორჩეულმა კარეკამ გასული საუკუნის 80-იან და 90-იან წლებში სახელი როგორც სამხრეთ ამერიკაში, ისე ევროპაში გაითქვა და უმაღლესი კლასის ბომბარდირის სტატუსი დაიმკვიდრა.

კარეკამ სახელი ჯერ კიდევ სამშობლოში გაითქვა — 1978 წელს ბრაზილიის ჩემპიონი „გუარანისთან“ ერთად გახდა, 1986 წელს კი ეს ტიტული „სან პაულუს“ შემადგენლობაშიც მოიპოვა.

1987 წელს ის იტალიურ „ნაპოლის“ შეუერთდა, სადაც დიეგო მარადონასა და ბრუნო ჯორდანოსთან ერთად ლეგენდარული შემტევი ტრიო — „მა-ჯი-კა“ ჩამოაყალიბა. ნეაპოლში გატარებული 6 ბრწყინვალე წლის განმავლობაში, ბრაზილიელმა გუნდს 1989 წელს უეფა-ს თასის, ხოლო 1989-90 წლების სეზონში სერია ა-ს ჩემპიონობის მოპოვებაში დაეხმარა.

სანაკრებო დონეზე კარეკა „სელესაოსთვის“ უმნიშვნელოვანესი ფეხბურთელი იყო. მან ბრაზილიის ნაკრების მაისურით 1986 წლის მექსიკის მსოფლიო ჩემპიონატზე იბრწყინა, სადაც 5 გოლი გაიტანა, მოგვიანებით კი 1990 წლის იტალიის მუნდიალზეც იასპარეზა.

ეროვნულ გუნდში ჩატარებულ 60 შეხვედრაში მან საკუთარი კლასი სრულად გამოავლინა და ბრაზილიური ფეხბურთის ნამდვილ ლეგენდად იქცა.

📰 წყარო: Estadio.GE