1994 წლის სატრანსფერო ბაზარი…

🚨 1994 წლის სატრანსფერო ბაზარი და იტალიური კლუბების სრული დომინაცია!

იმ პერიოდში საფეხბურთო სამყაროს გრავიტაციული ცენტრი სერია A იყო. ყველაზე მსხვილი 25 ტრანსფერიდან 14 სწორედ იტალიურ კლუბებზე მოდიოდა. ურუგვაელი შემტევი დანიელ ფონსეკა „ნაპოლიდან“ „რომაში“ თითქმის 13 მლნ ევროს სანაცვლოდ გადავიდა, ნეაპოლელებმა კი ის ბენი კარბონეთი ჩაანაცვლეს.

მეკარეების ნამდვილი როქი შედგა: ჯანლუკა პალიუკა „სამპდორიადან“ „ინტერში“ გადაბარგდა, ლეგენდარული ვალტერ ძენგა კი საპირისპირო მიმართულებით წავიდა. „სამპდორია“ ალესანდრო მელიმაც დატოვა და „მილანს“ შეუერთდა.

ტურინის „იუვენტუსში“ კი მარჩელო ლიპიმ ნამდვილი რევოლუცია წამოიწყო. გუნდმა ანდრეას მიოლერი, დინო ბაჯო და პიერლუიჯი კაზირაგი გაასხვისა, მათ ნაცვლად კი დიდიე დეშამი, პაულუ სოუზა და ჩირო ფერარა დაიმატა. ლიპიმ აქცენტი ტაქტიკურ დისციპლინასა და ფიზიკურ სიმძლავრეზე გააკეთა, რამაც „ბებერი ქალბატონი“ კვლავ ევროპის მწვერვალისკენ წაიყვანა.

ამბიციებს არც სხვა კლუბები მალავდნენ. „ფიორენტინამ“ „ბენფიკადან“ რუი კოშტა დაიმატა — პორტუგალიელი გარემარბი „ფლორენციის“ ნამდვილ სიმბოლოდ იქცა. „სამპდორიამ“ კი „რომადან“ სინიშა მიხაილოვიჩი წაიყვანა. სწორედ აქ დაიწყო სერბის ტრანსფორმაცია ისტორიაში ერთ-ერთ ყველაზე სახიფათო მცველად.

ესპანეთში იოჰან კრუიფის „დრიმ თიმის“ ეპოქა სრულდებოდა. ჩემპიონთა ლიგის ფინალში „მილანთან“ განადგურების შემდეგ, „ბარსელონამ“ ცვლილებები დაიწყო. რომარიომ და გოიკოეჩეამ გუნდი დატოვეს, მათ ნაცვლად კი „კარპატების მარადონა“, გეორგე ჰაჯი და ესკურსა მოვიდნენ.

ინგლისში პრემიერ ლიგა ფინანსურ კუნთებს ნელ-ნელა შლიდა. „ბლექბერნმა“ კრის სატონის ტრანსფერით ბრიტანული რეკორდი მოხსნა, „ლივერპულმა“ კი დაცვის გასაძლიერებლად ფილ ბაბი და ჯონ სკეილსი დაიმატა. „მანჩესტერ იუნაიტედმა“ კი ენდი კოულის სენსაციური ტრანსფერი განახორციელა.

თუმცა, ყველაზე მნიშვნელოვანი გარიგება ნიდერლანდებში შედგა: „პსვ“-მ „კრუზეიროდან“ 17 წლის ფენომენი, რონალდო გაიფორმა. არსენალმა კი ერედივიზიონიდან გლენ ჰელდერი დაიმატა.

1994 წლის ზაფხული გარდამტეხი აღმოჩნდა. ეს იყო იტალიური ჰეგემონიის პიკი და ახალი ეპოქის დასაწყისი, სადაც პრემიერ ლიგამ და გლობალურმა სკაუტინგმა წინა პლანზე წამოიწია. დინასტიები სწორედ ასეთ ცხელ სატრანსფერო პერიოდებში შენდება.