დღეს „ლივერპულის“ ლეგენდარული…

🚨 დღეს „ლივერპულის“ ლეგენდარული თავდამსხმელი, იან რაში 65 წლის გახდა!

უელსის ნაკრებისა და „მერსისაიდელთა“ ისტორიაში საუკეთესო ბომბარდირმა კარიერის განმავლობაში „იუვენტუსის“, „ლიდსის“, „ნიუკასლის“, „შეფილდ იუნაიტედის“, „ჩესტერისა“ და „რექსჰემის“ ფორმაც მოირგო. მან ეროვნულ გუნდში 73 მატჩი ჩაატარა.

რაშის ფენომენალური გზა უელსის პატარა ქალაქ სენტ-ასაფში დაიწყო. 10-შვილიან ოჯახში გაზრდილი ბიჭისთვის ფეხბურთი დიდი მომავლის შანსი აღმოჩნდა. მისი ნიჭი „ჩესტერ სიტიში“ გამოჩნდა, სადაც 17 წლის ასაკში მისი დებიუტი შედგა. 1980 წელს „ნიუკასლთან“ მოგებულ მატჩში იანმა ისეთი შთაბეჭდილება დატოვა, რომ „ლივერპულის“ ლეგენდარულმა მწვრთნელმა, ბობ პეისლიმ მის სანაცვლოდ იმ დროისთვის სარეკორდო თანხა — 300 ათასი ფუნტი გადაიხადა.

„ენფილდზე“ ადაპტაცია მარტივი არ ყოფილა. ვარსკვლავებით სავსე გასახდელში ახალგაზრდა უელსელი თავიდან დაიბნა და გოლის გატანას ვერ ახერხებდა. საქმე იქამდეც მივიდა, რომ 1980 წლის ბოლოს ტრანსფერი მოითხოვა, თუმცა პეისლიმ მას ურჩია, მოედანზე უფრო „ეგოისტი“ ყოფილიყო. ამ რჩევამ ყველაფერი შეცვალა — 1981 წელს გატანილი პირველი გოლის შემდეგ, რაში შეუჩერებელი გახდა.

კენი დალგლიშთან მისი ტანდემი ფეხბურთის ისტორიაში ერთ-ერთ საუკეთესოდ ითვლება. 1983-84 წლების სეზონი კი რაშის კარიერის პიკი იყო: 47 გოლი 65 მატჩში, „ოქროს ბუცი“ და ისტორიული „ტრებლი“ — ჩემპიონთა თასი, ინგლისის ჩემპიონატი და ლიგის თასი.

1987 წელს რაში სარეკორდო 3.2 მლნ ფუნტად „იუვენტუსში“ გადავიდა, თუმცა იტალიური სტილი და ცხოვრების წესი მისთვის უცხო აღმოჩნდა. სულ რაღაც ერთ წელიწადში ის კვლავ „ლივერპულში“ დაბრუნდა, რამაც გულშემატკივრები აღაფრთოვანა.

დაბრუნება მძიმე პერიოდს დაემთხვა — ჰილსბოროს ტრაგედიამ გუნდი და ქალაქი შეძრა. რაშმა უდიდესი როლი ითამაშა კლუბის ფეხზე წამოდგომაში. მან „ლივერპულის“ მაისურით ჯამში 346 გოლი გაიტანა, რაც დღემდე მიუღწეველი რეკორდია. კარიერის მიწურულს ის ახალგაზრდა რობი ფაულერისთვის ნამდვილ მენტორად იქცა.

ეროვნულ ნაკრებში რაში ათწლეულის განმავლობაში შეუცვლელი ფიგურა იყო. მისი ყველაზე დასამახსოვრებელი გოლი 1991 წელს მსოფლიო ჩემპიონ გერმანიის კარში გატანილი გამარჯვების ბურთია. 28 გოლით ის დიდი ხნის განმავლობაში უელსის საუკეთესო ბომბარდირი იყო, სანამ ეს რეკორდი გარეთ ბეილმა არ მოხსნა.

იან რაში მხოლოდ გოლებით არ გამოირჩეოდა. ის იყო „დაცვის პირველი ხაზი“, რომელიც მეტოქეს ამოსუნთქვის საშუალებას არ აძლევდა. მისი პროფესიონალიზმი, ლეგენდარული ულვაშები და თავმდაბლობა მას „ლივერპულის“ ოქროს ეპოქის სიმბოლოდ აქცევს.

დღეს ის კვლავ ხშირი სტუმარია „ენფილდზე“, სადაც მისი სახელი ისევ ისმის ტრიბუნებიდან. იან რაში რჩება ეტალონად ყველა იმ თავდამსხმელისთვის, ვინც ფეხბურთში თავგანწირვასა და გოლის ალღოს აფასებს.